Написание за правата вяра / Написание ѡ правѣи вѣрѣ · иꙁꙋщеное кѡстантиномъ блаженымь фїлософомъ · ѹчителемь о бꙃ҃ѣ словѣнскомѹ ѫꙁыкѹ

Написание ѡ правѣи вѣрѣ · иꙁꙋщеное кѡстантиномъ блаженымь фїлософомъ · ѹчителемь о бꙃ҃ѣ словѣнскомѹ ѫꙁыкѹ ։~ Въ имѧ ѡ͠ца и с͠на и ст͠го д͠ха · кѡстантинъ философъ правовѣрно о истиннѣмъ б͠ꙃѣ · ѹчитель словѣнскыи исповѣдѹѫ подьписанїа · Вѣрѹѫ бо ѹбѡ въ единого б͠а ѡ͠ца въседръжителѣ · всѣмь видимымъ и невидимымъ · творца же и г͠а · беꙁначѧлна · невидима · неѡдръжима · неиꙁмѣнна · бесконечна · И въ единого г͠а ї҃ѵ х͠а с͠на единорѡдна · беꙁначѧлно и беꙁврѣменно · и прѣж(д)е вьсѣхь вѣкъ · ѿ о҃ча сѫщьства въсиавша · И въ единъ дх͠͠ъ ст͠ыи · исходѧщъ ѿ б҃а ѡц͠а единого · и съ ѡ͠цемь и с͠номъ б͠͠гословимꙑи же и славимы · ꙗкосъ естьствныма и съ нима прѣбываѫ · тр(о)цѫ ѹбѡ славлѧ ипостасми · сирѣчь лицы · и которагож(д)е ѿ реченыхь · несмѣсна · ни раꙁмѣсна · блюдыи раꙁмѣснаа своиства · ꙗко никакоже прѣлагаемъ и движемъ · ѡч͠ее ѹбо есть нерождение · и винѫ сѫщима ѿ него · сн͠овнееже есть рождение · дх͠аже исхождение · и ꙗко ѿ оц҃а едино · раждаемое же и исходимое · ѿ того въсиавь · и ꙗко свѣтъ котороеж(д)о ѿ свѣта прошедъ ։ Единъ свѣтъ надъ всѣмъ миромъ · трьмѣсѧченъ и тръслънеченъ · единствѹ же сѫщьствомь кланѣѫ сѧ · съвъкѹплѣѫщомѹ сѧ въ единѫ высѡтѫ бж(с)тва · прѣсѫщнѫ прѣестествнѫ · томѹж(д)е нераꙅ(или Ꙁ)дѣлнѹ · и нерастѫпнꙋ · славѫ же и дръжавѫ имѧщѹ · въ единомъ съвѣтѣ и хотѣнїи · и вь едино и силѣ и дѣтѣли ꙁнаемомѹ · и ꙗко сѫщѹ вьсѣмь ц͠рю · и вьсѣми ѡбладаѫщомѹ · ѿ вьсеѫ видимыѫ же и невидимыѧ твари, равночьстномѹ и равнопрѣстолномѹ · кланѣние приемлѧщѹ и слѹжбѫ · Едино бо бж(с)тво видимь вь трехь сѫщьством(?) единѹѫще сѧ · триже сълична въ единомъ бж(с)твѣ · нераꙁдѣлно раꙁдѣлѣемь · инако како по коиждо ѿ сѫщїихь своистьвъ · ни сн͠а ѿ сѫщьства нѫ рожденаго ѡ͠ца тѹжда творѧще · ꙁане есть рожденъ · ни ст͠го же дх͠а тѹжда творѧще ѡ͠цѹ и сн͠ѹ · ꙁане ѿ оц͠а исходить · ни раꙁмѣшениа вѣдѧще ꙁа единение естьствное и нераꙁдѣление · нѫ въ ѡбщенїи естьствнѣмь · раꙁлѫчение примѣшаѫще къ своиствномѹ · раꙁдѣлѣетбо сѧ нераꙁдѣлно · и съвъкѹплѣетьсѧ раꙁдѣлно · едино бѡ въ тре(х) бж(с)тво · и триедино вь ни(х) бж(с)тво · ꙗкоже ны ѹчить бг͠ословъ григорие наньꙁианскы · б҃а ѹбо ѡц͠а чьтѫ · Ѿ негоже вьсѣ въ бытие приведошѫ сѧ · б҃а с͠на славлѧ · имже вьсѣ бышѫ · и въ сѫщнѣмь бытии прѣбываѫть · б҃а д͠ха ст͠аго величаѫ · имже всѣ съхранѣѫтсѧ и съдръжѫть · единого б҃а въ трехь чьтѫ · не въ три богы раставлѣѫ единого бж(с)тва · да сѧ ꙋклонѧ ѿ три бж(с)тва · паче же многобж(с)твнаго беꙁбожиа · и съвръшена къж(д)о ѿ сихъ съвѣмъ · не ѿ три бо несъвръшенъ единъ что исповѣдаѫ съвръшено · нѫ ѿ трїи съвръшенъ едино прѣсъвръшено и прѣсъвръшенѣе · ꙗкоже ст͠хъ ѿ͠ць наставлѣеть бл҃гословествие · ни сѫщьствомже ѹбѡ · ꙗко естьствь тѹждъ · и раꙁличень неравеньствомь, етеры ѿсѣ(ка)ти начинаѫ · нѫ раꙁдѣлѣѫ словомъ своистьвнымъ · къ единствѹ сѫщномѹ · съвъкѹплѣѫ лихое ѿ сихь · ли мнѣние ѿметаѫ · болшаа бо ли мнѣиша ꙗко н(с)ѣ видѣти · въ единосѫщнѣи троици по сѫщьствꙋ или по бж(с)твѹ · да арианское неистовство ꙋгашѫ · ѿ него же и къ немѹ же ми нинѣшнѣа брань · Ни пакы въ едино сѫщьство слагаѫ или смѣшаѫ · нѫ лицы сѫщими · и вещьми имены · раꙁдѣлное съвъкѹпление по сѫщьствѹ приношѫ · да са велианское неист(о)вьство ѡмрачѧ · противнаа ꙁла и кѹпна нечистымъ · итатебнарещи · съвъкѹплѣѫ раꙁдѣлѣѫ бг҃очьстно · и раꙁдѣлѣѫ съвъкѹплѣѫ б͠голѣпно · къ семѹ же еже есть раꙁ(д)ѣлено сѫщьствомъ · ѡбщениемь естьствнымь съвъкѹплѣѫ · а съвъкѹпленое сѫщьствомъ и бж(с)твомъ · раꙁ(д)ѣлениемь триличнымъ раꙁѹмѣваѫ по ѡбо емѹ · О велицѣи б͠жїи прѣвышнїи таинѣ сѫщїи о на(с) · благовѣрѹѫ и ꙁдравъ сыи ѹмомъ · такъ сыи слѹжитель прѣс͠тѣи тр(о)ци · дх҃омъ и истиноѫ слꙋжѫеи · въ чистѣ и непорѡчнѣи славѣ · вьсѧ дн͠и живѡта моего · тако ꙋбѡ о прѣкращенѣмь семь и неиꙁре(ч)ннѣмь бж͠ии словеси · ѹтвръжденыи подъ пръты исповѣдаѫ единого ѿ единосѫщныѫ троицѫ · г҃а нашего ї҃ѵ х͠а с͠на бж͠иа б͠а нашего · ꙁарѧ ѡч͠ѧ славы · свѣтъ ѿ свѣта · неиꙁмѣнное ѡч͠ее по(д)бие и ѡбраꙁъ сѫщьства его · въ пльть пришедша на ꙁемѧ · и скончавша съмотрение еже о на(с) · бывша по нашемѹ ѡбраꙁѹ · неиꙁре(ч)ннымъ бо тъ чл͠колюбиемь · мл(с)рдиемь милости и щедрѡтами движемъ · не тръпѣ до конца нашего рода ꙁрѣти · горкымъ мѫчителемь порабощена · нѫ благоволѧщѹ ѡц͠ѹ и прѣс͠томѹ и живѡтворѧщомѹ дх͠ѹ поспѣшьствѹѫщѹ · ѡч͠ѧ славы никакоже ѿстѫпль · ни своихь и бг͠олѣпныхь чьстїи по чьсомѹ етерѹ ѡставль · ниꙁложи сѧ въ смѣрение волное · и въпльщь сѧ ѿ ст͠го д͠ха · и ѿ прѣс͠тыѫ и славныѧ въ истинѫ бц͠ѫ и присно дв͠ы марїѧ · и дш͠ѫ и пльть прѣдъ очищьшѫ дх͠омъ · и чл͠къ по всемѹ кромѣ грѣха бывъ · въ мрътьвное естьство и истлѣваемое и исписаемое ѡблькь сѧ · един ѿ обоего въшедъ · тъж(д)е ѿ бж(с)тва и чл͠чьства · и съвръшенъ по всемѹ неиꙁмѣненъ прѣбы въ бж(с)твомъ · И съвръшенъ також(д)е и непрѣложенъ чл͠чьствомъ · имже и съ нами поживъ · адамово ѹбѡ прѣслѹшание своимъ несъгрѣшениемь ицѣли · а истлѣние еже ѿ грѣха, волноѫ стр(с)тиѫ пльтскоѫ · и съмртиѧ животворѧщоѫ · и въскръсениемъ бг͠олѣпнымъ раꙁорь, неистлѣние намъ дарѡва · въскръсе бо тридн͠евно испр(о)връгъ съмръть · и пръвѣнець иꙁ мрт͠выхь бысть · собоѫ наставль чл͠чь родъ на нетлѣнныи пѫть · иꙁемже невидимаго врага ѿ нашего насилованиа · вьсѣ сътвори и приемъ, елико въ ст͠хъ еѵ(г)лихь проповѣдаетсѧ · и нами вѣрѹемо есть · ими же ветхаго адама посѫди · и нашего естьства ѡбнови · и въ пръвѫѧ чьсть въꙁврати · и въшедъ на нб͠са, съсѣдника съ прѣстоломъ ѡч͠емь · начѧтокъ нашего примѣшенїа сътвори · тако бѡ ꙗко ꙗснѣе рещи, великѫѧ и чьстнѫѧ таинѫ бывшѫѧ б͠жїа съмотренїа · исповѣдаѫ скаꙁаѫ · аще же ли потрѣба есть и пространнѣе како ѡ семь ѡбѧти · ꙁавъꙁницаѫщѫѧ · и етера тъщеглашениа нинѣ примышлѣѫщѫ се · абие речемъ ꙗко естьствомъ сыи б͠ъ · единорѡдныи сн͠ъ и слово б͠а ѡц͠а · рождеи сѧ ѿ него прѣжде вѣкъ · неиꙁгл͠анно и беꙁсѣменно · не ѿ ложь бытиа еже бѣ естьствомъ б͠ъ въ послѣднѣа врѣмена вѣка чл͠чее естьство приѫтъ · и пльти и кръви нашеи искръ приѡбщи сѧ · слово бѡ пльть бы(с) и вьсели сѧ въ ны · не въ простѫ пльть приемъ · нѫ дш͠еѫ словесноѫ и съмыслъноѫ въдш͠енѫ · тьжде единъ сн͠ъ и по въпльщени сыи · единосѫщнѹ б҃ѹ и ѡц͠ѹ по бж(с)твѹ · единочѧднѹ же и намъ по чл͠чьствѹ · хранѧ и съблюдаѫ · и въ сънѧтии неиспровръжена и непрѣложна · сѫщаа въ нею своиствомь естьвнаа раꙁлична · въ коемьждо естьствѣ сложьшиима сѧ въ то · и едино тѣло · се бѡ новое и дивное смѣшение · ни ꙁьлиавшаго сѧ бж(с)тва и приѫтаго чл͠чьства · ѿнего же въ единомъ тѣлеси · сънѧтие скончавше сѧ нами ꙁнаемо есть · се бо есть дивнѣе · еже сѧ раждаеть б͠ъ съприѫтиемь · слово бѡ съвръшенъ сыи б͠ъ · къ съвръшенѹ члк͠͠ѹ примѣси сѧ · въ едино тѣло сложно смѣшь сѧ по немѹ · сего ради и рождьшиа его, въ истинѫ и рѣсно тѫ бц͠а нами нарицаема есть · рож(д)ь бо сѧ ѿ оц͠а беꙁмт͠͠ре беꙁначѧла прѣж(д)е · ѿ мт͠ре беꙁь ѡц͠а роди сѧ второе · не бж(с)твѹ его приемшѹ ѿ себе начѧтка · нѫ прѣбывъ еже бѣ · и еже не бѣ приемь свое створи · и бы(с) ходатаи междѹ б͠а и чл͠кы · котором(ꙋ)ждо приѡбщи всѧ равно естьствномѹ сѫщьствѹ · гл͠ѧже бж(с)твнѹ и чл͠чю · въ едино лице съвъкѹплѣѫ сѧ · ибо и съвъкѹпльши сѧ ѡбѣ естьствѣ въ едино · единого х͠а и сп͠са и г͠а скончастѣ · единь бо ѿ обою и шедъ раꙁꙋмѣваемь есть х͠с · по раꙁѹмѣваемомѹ и по видимомѹ · ꙗкоже съвръшенъ и неиꙁмѣненъ прѣбы въ бж(с)твомъ · такожде и съвръшенъ и непрѣложенъ бывъ по чл͠чьствѹ · не приемлѧ стр(с)ти по бж(с)твѹ · по немѹ же паче естьства чл͠ча творѣше чюдеса · ꙗко беспльтенъ неистлѣнень же · Також(д)е и неописанъ и бесъмрътенъ · приемлѧ стр(с)ти по чл͠чьствѹ въпльти бо сѧ · по немѹ же чл͠чѧ стр(с)ти приимашѫ · и мрътвенъ тьж(д)е и сп(с)енъ же и описанъ · ꙗкоже бы(с) чл͠къ ѿ сѣмене дв͠два · своѧ же сътворить своего тѣлесе слово стр(с)ти · распѧтие же и съмрть · и прочаа елико съмотръливно насъ ради постр(д)ати иꙁволи · чьстноѫ бо его кръвиѫ искѹплени быхѡм(?) продани грѣхомъ · еѫ же прѣграж(д)ение оплотное раꙁори враж(д)и своеѫ пльтиѫ · и съ мирь нб͠снаа съ ꙁемными · и единѫ цр͠квъ · и съборъ аггелѡмь и чл͠кѡмь на н͠бси и на ꙁеми ѹстрои · единъ ѹбѡ есть ѡбое · ибо и страждѫ · ничесоже пострада ꙁа ны своимь естьство · съг͠лати сѧ небж(с)твнымь нѫ пръстнымъ ест(?)ствомъ · свое бо емѹ есть пострадавшее тѣло въселичьскы · славѫ бж͠їаго естьства · и чл͠чѧ нищеты ꙗвлѣѫ · да непривидѣние съмотрение бж͠ие въꙁнепщевано бѫдеть · и прѣбы(с) ꙗкоже б͠ъ въч͠лчи сѧ · тако же и въ бж(с)твнѣи славѣ чл͠къ · ничимже мнии есть · въ ѡбою бо единъ въ кѹпѣ б͠ъ и чл͠къ емманѹилъ · понеже ꙋбѡ тако на прѣдѣлѣ(х) благовѣрныхь стоимь · тако ѡ сихь славѫ · сꙋгѹбое бо съшедшїма сѧ въ немъ сѫщьствома · съ своиствы съвръшено и нескѫдно · ѿ сею ѡбою которо еждо проповѣдаѩ · бывшее же ѿ сею сънѧтие единосѫщно въ едино лице по тѣлесномѹ съвъкѹплению · такожде исповѣдаѫ · нераꙁ(д)ѣлѣѫ въ два сн͠а · единого г͠а ї҃ѵ х͠а · въ чл͠ка ѡсобь и почѧсти · да беꙁѹмное и чл͠кочьстное несториево раꙁдѣление раꙁорѧ · ни пакы смѣшаѫ ни иꙁмѣнѹѫ · единого лица единению въ тожде къ единомѹ естьствѹ приводѧ · нѫ нераꙁмѣсна и нераꙁдѣлна · хранѧ раꙁличию сѫщаа въ коемждо естьствѣ · дасѹеѹмное евтихово смѣшение раꙁорѧ · въкѹпѣ и сѫщѫѧ о севирѣ нареченыѫ добрѣ беꙁглавны · си бѡ смѣшаеть ꙁлѣ · а ѡнъ раꙁдѣлѣеть нечьстно · ꙗко въ тожде въпадъ о съмотрени бж͠їи · евтихїи къ несторию въ неже и савелии о б͠гсловствїи къ арию · исповѣдаемома ѹбѡ о х(с)ѣ двѣма естьствома съвръшенома · сѫщьствома же и сѫщаа · о сею естествнаа своиства исповѣдати съ ними подобаеть · и сѫщаа на коемж(д)о своиствѣ своистьвнаа хотѣниа и дѣтѣли · потрѣба бо есть сѹгѹбома сѫщьствома въ истинѫ сѫщема · сѹгѹбыи си съ нима проповѣдати · не инако бо како сѫщее въ истинѫ съвръшение въ сею блюдет(?) сѧ · понеже сии ѡбраꙁъ ꙗвлѣеть естьствома · и нѣ(с) о страсти естьства · беꙁь хотѣниа и беꙁь дѣтѣли · ꙗко бо божскы ꙗко б҃ъ хотѣше же и дѣаше · такожде и чл͠че хотѣше же и дѣаше · по б͠жиемже ꙁнамениемь · и по чл͠чемь вещемъ · не противень же сихь етеръ къ етера мъ имѣше · покарѣше бо сѧ и повиновааше · при имы приѫтомꙋ ꙗкоже бо ꙋбѡ ничто же видѣно бы(с) въ немъ противно и прѣкопно ѿ съше(д)шою сѧ естьствѹ · ибѡ не противнѣ естѣ · ꙁнамение же се имже бѡ сѫт(?) сѫщьства раꙁлична, то и слово бываемо раꙁлично ѡ нихь · еже о раꙁньстьвнѣхь естьствѣхь ꙗвлѣетсѧ · Потрѣба и сѫществ(н)аа своиства · по хотѣнию и дѣтѣли раꙁлично имѣти · тѣми бо и хѫдожьство естьством(?) приемлемъ · понеже бѡ и имже сѫтъ дѣтѣли тыжде · то и естьства равна · тако ꙋбѡ и бг͠омѫжно и дѣтѣли · х(с)во житие иꙁьꙗснитсѧ · имже съ нами пожить · ꙗвѣ раꙁѹмѣваемо по(д)бнымъ именованиемь · ѡбѣма естьствома ѡбѣ дѣтѣли скаꙁаѫ · съвъкѹпленїа бо ѡбычаи · раꙁньствное слово въ себѣ имать съвръшено · семѹ бо дастъ кто и дѣати · которыиждо ѡбраꙁъ · съ которымждо ѡбщениемь · не проповѣдаѫ ꙋбѡ единого хотѣнїа и дѣтѣли о б͠жиемь смотренїи · ѿемлѧ етеры прѣбывшихь къ сѫщьствома · аще не въсхощѫ и самого естьства раꙁарѣти · ꙗко да не въпадѫ въ несъмыслънаго и неистоваго аполинариа недѫгъ · раꙁорѧ же съ нимъ севирово и пирово беꙁѹмие · еже сѧ ꙗви о бж͠їи правѣмъ словеси · беꙁь хотѣниа и дѣтѣли · по семь нами чьстнаа и спаснаа таина бж͠иа съмотренїа славима есть · ꙗже и раꙁѹмѣваема и неиꙁг͠ланна прѣбываеть · и гл͠ема неиꙁвѣдома · по рекшомѹ ст͠мѹ бг͠оносцѹ · тѣмь ѹбѡ посѣщениемъ спс͠͠ти сѧ исповѣдаемъ · и съ всѣми сѫщими и чьстными молитвищы · и сиѫ ѡбраꙁы ст͠ыѧ и ꙁнаменїа чьтемъ и ѡблобыꙁаемъ · ими же намъ по ѡбраꙁѹ вьсѧ еѵ(г)льскыѧ повѣсти скаꙁаны бышѫ · аще нѫ и въ памѧть въставлѣѫть бывшѫѧ сп͠сомъ на(с) ради бж͠їа словесе · ꙗкоже съ выше и испръва бл͠говѣрно прѣѫхѡ(м) · с͠ни ѡц͠а си хранѧще почьсти говѣние сътворимь · а не бж(с)кыѫ имъ слѹжбы творимъ и кланѣнїа · да не бѫдеть · ꙗже по(д)баеть б҃ѹ единомѹ ѡбладаѫщомѹ вьсѣми · въси бѡ сѫщїи бж͠иемь дх͠омъ наѹчени · видѧть раꙁличие чьсти · икѫѧ по(д)баеть х(с)ѹ б҃ѹ нашемѹ чьсть и кланѣние въꙁдаати · и ст͠ымъ иконамъ по(д)бнѫѧ чьсть творити · и ѿ тѣх(?) къ пръвомѹ ѡбраꙁѹ его же тѣло есть написано чьсть въꙁносити ։~ Къ симь чьтѫ чьстныѫ иконы пр(с)тыѧ и прч(с)тыѧ вл(д)чцѧ нашеѧ · истинныѧ момощницѫ нашеѧ и присно дв͠ы бц͠ѫ марꙇѧ · рождьшѫѧ по пльти г͠а ї͠с х͠а б͠а нашего беꙁсѣмене и неиꙁре(ч)нно · и беꙁь всего примышленїа · також(д)е и ст͠хь аг͠глъ · и ст͠͠хь и славных(?) ап(с)лъ и м(ч)нкъ · и инѣхь въсѣхь ст͠хъ ѹгождьшихь емѹ ѿ вѣка · ꙗкоже и никеискыи ст͠ы и великыи съборъ, бл͠говѣрно и бг͠оꙋгодно прѣда(с) · и прочии бл͠говѣрнїи и въселенстїи събори ѹтвръдишѫ · такожде и чьстныѧ ихь памѧти творѧще · сице аꙁъ своѫ вѣрѫ исповѣдаѫ · и съприсным(?) моимъ братомъ меѳодиїемь и поспѣшникомъ въ бж͠їи слѹжбѣ · въ сеи бо есть сп͠сение и ѹпование · и сиѫ прѣдаевѣ своимь ѹченикѡм(?) · да сице вѣрѹѫще сп͠сѫтсѧ · и въ страшныи дн͠ь сѫдныи пакы прѣдадѧть ѫ нама · истиннѫ неиꙁмѣннѫ съвръшенѫ ѡ деснѫѧ странѫ ставьше · прѣ(д) ꙇ҃ѵ хо͠мь г(д)мъ истиннымъ бг͠омь нашимъ · емѹже слава въ всѧ вѣкы, аминъ ։—