За буквите / О писменехь

О писменехь чрънори́ꙁца Хра́бра Прѣжде ѹбѡ словѣне не и҆мѣхѫ книгъ · нѫ чрътами и҆ рѣꙁами чьтѣхѫ и҆ гатаахѫ погани сѫще · кръстивше же сѧ, ри́мсками и҆ гръчьскыми писмены, нѫждааха сѧ словѣн‘скы рѣчь беꙁь ѹ҆строениа · нѫ како мо́жеть сѧ писати добрѣ гръчьскыми писмены · б҃ъ · и҆ли живѡтъ · и҆ли ꙃѣлѡ · или цр҃ковь · и҆ли чаание · и҆ли ширѡта · и҆ли ‘ꙗдь · и҆ли ѫ҆дѹ · и҆ли ю҆ность · и҆ли ѫꙁыкъ · и инаа по(д)бнаа симь · и҆ тако бѣшѫ многа лѣта · Потом же чл҃колюбецъ б҃ъ строѫ и всѣ · и҆ не ѡставлѣѫ чл҃ча рода беꙁь раꙁѹма · нѫ всѧкъ раꙁѹмѹ приводѧ и҆ сп҃сению · помиловавь родъ чл҃чь · посла и҆мь ст҃го кѡстанти́на философа нарицаемого ки́рила · мѫжа праведна и҆ истинна · и́ сътвори и́мъ, л҃ · писмена и҆ о́смь · ѡва ꙋбѡ по чинѹ гръчьскыхь писменъ · ѡва же по словѣнстѣи рѣчи · ѿ пръваго же наченъ по гръчьскѹ · ѡни ѹ҅бо алфа · а҆ съ̏, а҅ꙁь · ѿ а҅ꙁа начѧть ѡбое · и҆ ꙗ҆коже ѡни подоблыше сѧ жидовьскымь писменемь сътво́ришѫ, тако и҆ съ̏ гръчьскымъ · жидове бѡ пръвое пи́смѧ имѧть а҅лефь · е҆же сѧ скаꙁаеть ѹ҆чинение съвръшаѫще · въводимѹ дѣтищѹ и҆ гл҃ѧще ꙋчи сѧ · еже есть алефь · и гръци подобѧще сѧ томѹ алфарѣшѫ · исподобисѧ речение скаꙁаниа жидовьска гръчьскꙋ ѫꙁыкѹ · да речеть дѣтищѹ вь ѹ҆чениа мѣсто и҆щи, алфа · бо иши сѧ речеть гръчьскомь ѫ҆ꙁыкомъ · тѣмбо по(д)бѧ сѧ ст҃ыи ки́рилъ створи пръвое писмѧ, а҅ꙁь · нѫ ꙗ҆ко и҆ пръвомѹ сѫщѹ писмени а҆ꙁь · и҆ ѿ б҃а данѹ родѹ словѣн҆скомѹ на ѿвръстие ѹстъ · въ раꙁѹмъ ѹ҆чѧщимсѧ бꙋквамъ · великомь раꙁдвижениемь ѹстъ въꙁгласитсѧ · а҆ ѡна пи́смена ма́ломъ раꙁ(д)вижениемь ѹстъ въꙁгласѧтсѧ и҆ и҆сповѣдаѫтсѧ · Се же сѫть писмена словѣньскаа · сицеа по(д)баеть писати и҆ гл҃ати · а҃ б҃ в҃ г҃ · Дрѹꙃии же гл҃ѧть по́что е҆сть, л҃и · писменъ ство́рилъ · а҆ мо́жеть сѧ и҆ меншимь того писати ꙗ҆коже и҆ гръци · к҃д, пишѫть · и҆ не вѣдѧть колицѣмь пишѫть гръ́ци · е҆сть бо ꙋбѡ, к҃д · писменъ · нѫ не наплънѣѫтсѧ тѣми книгы · нѫ приложили сѫтъ двогласныхь, а҃ꙇ · и въ чисменехже, г҃ ꙅ҃ е҃ · и҆҃ ѳ҃ десѧтное · и҆ ѳ҃ сътное · и҆ събираѫтсѧ ихь, л҃и · тѣмже по томѹ по(д)бно · и҆ въ тьж(д)е ѡбраꙁъ ство́ри ст҃ыи ки́рилъ, л҃и · писменъ · Дрѹꙃии же гл҃ѧть чесомѹ же сѫть словѣнскы книгы · ни того бо е҅сть б҃ъ ство́рилъ · ни то агг҃ли · ни сѫть и҆ж(д)еко́нни · ꙗ҆ко жидовьскы и҆ римьⸯскы и҆ еллинⸯскы · и҆жде ѿко́на сѫть · и҆ приѫты с(т)ѫ б҃мъ · а҆ дрѹꙃии мнѧть ꙗ҆ко б҃ъ намъ е҆сть створилъ писмена · и҆ не вѣдѧтсѧ что гл҃ѧще ѡкааннии · и҆ ꙗ҆ко трими ѫ҆ꙁыкы е҆сть б҃ъ повелѣлъ книгамъ быти · ꙗ҆коже въ е҆ѵ(г)ли пишеть · и҆ бѣ дъска написана жидовьскы и҆ римⸯскы и҆ е҆ллинⸯскы · а҆ словѣнⸯскы нѣ(с)тѹ · тѣмже нѣ сѫть словѣнⸯскыѫ книгы ѿ б҃а ։ къ тѣмь что гл҃емь · и҆ли что ре(ч)мь къ тацѣмь беꙁѹмиемь · ѡбаче речемъ ѿ ст҃хь книгъ ꙗ҆коже наꙋчихѡмсѧ · ꙗ҆ко вⸯсѣ по рѧдѹ бываѫть ѿ б҃а · а҆ не и҆ногдоѫ · нѣсть бо б҃ъ створилъ жидовьска ѫ҆ꙁыка прѣж(д)е · ни римⸯска · ни еллиньска · нѫ сирⸯскы · и҆мже и҆ а҆дамъ г҃ла · и҆ ѿ а҆дама до потопа · и҆ ѿ потопа дондеже б҃ъ раꙁдѣли ѫꙁыкы при стльпотворенїи ꙗ҆коже пишеть · раꙁмѣшеномже бывшемь ѫ҆ꙁыкѡмъ · и҆ ꙗ҆коже сѧ ѫ҆ꙁыци раꙁмѣсишѫ, тако и нрави и обычае и ѹстави · и ꙁакони · и хытрости, на ѫꙁыкы · е҆гиптѣнѫмже ꙁем(л)емѣрение · а҆ пе́рсѡмъ и҆ халде҆ѡмъ и҆ а҆сире҆ѡмъ, ꙃвѣꙁдочьтение · вльшвение · врачевание · чарованиа · и всѣ хытрость чл҃ча · жидовомже ст҃ыѫ кни́гы · вь нихже есть писано · ꙗ҆ко б҃ъ нб҃о створи и҆ ꙁемлѧ · и҆ всѣ ꙗ҆же на неи · и҆ чл҃ка · и҆ всѣ по рѧдѹ ꙗ҆коже пи́шеть · еллинѡмъ граматикнѧ · ритотикиѧ · философиѫ · Нѫ прѣж(д)е сего еллини не и҆мѣхѫ свои҅мъ ѫ҆ꙁыкомь писменⸯ · нѫ финичьскыми пи́смены писахѫ своѫ си рѣчь · и҆ тако бѣшѫ многа лѣта · Панамидь же послѣжде пришедъ · наченъ ѿ а҅лфы и҆ ви́ты, ѕ҃і · пи́сменъ тъкмо еллинѡмъ ѡбрѣте · прѣложи же и҆мъ кадьмъ милисїи писмена, г҃ · тѣмѫе многа лѣта, ѳ҃ꙇ · писмены писаахѫ · и҆ по томъ симони́дъ ѡбрѣтъ приложи двѣ пи́смени · ҆епихарїи же скаꙁатель, г҃ · писмена ѡбрѣте · и҆ събра сѧ и́хъ, к҃д · по мноꙃѣхже лѣтѣхь дионись граматикъ, ꙅ҃ · двогласныхь ѡбрѣте · по томже дрѹгыи, е҃ · и҆ дрѹгыи г҃ · чисменитаа · и҆ тако мноꙃи многыми лѣты · е҆два събрашѫ, л҃и · писменъ · по томже многомъ лѣтѡмъ минѫвшемъ · бж҃иемъ повелѣниемъ ѡбрѣте сѧ, о҃ · мѫжъ · иже прѣложишѫ ѿ жидовъскаа на гръчьскыи ѫꙁыкъ · а҆ словѣнⸯскыѫ кни́гы · е҆ди́нъ ст҃ыи кѡстанти́нъ нарицаемыи кирилъ и҆ пи́смена ство́ри и҆ кни́гы прѣложи въ малѣхъ лѣтѣхь · а҆ ѡни мноꙃи многы лѣты · ꙁ҃ · и́хъ писмена ѹ҆стро(и) · а҆ о҃ · прѣложение · тѣмже словѣнⸯскаа пи́смена, ст҃ѣиши сѫ(т) и҆ чьстнѣ҆иша · ст҃ь бѡ мѫжъ створилъ ꙗ ѥ(с) · а гръчьскаа еллини погани · ҅Аще ли кто речеть ꙗ҆ко нѣ(с) ѹ҆строилъ добрѣ · понеже сѧ постраꙗѫть и҆ е҅ще · ѿвѣтъ речемь си́мь · и҆ гръчьскы також(д)е · многажди сѫть постраꙗли · а҆килла и҆ симмахъ · и҆ по томъ ини мноꙃи · ѹ҆добѣе бо е҆сть послѣж(д)е потворити неже пръвое ство́рити · ́Аще бо въпро́сиши книгъчиѧ гръчьскыѧ гл҃ѧ · кто вы е҅сть писмена створилъ · и҆ли кни́гы прѣложилъ · и҆ли вь кое врѣмѧ, то рѣдⸯцїи ѿ нихь вѣдѧть · аще ли въпро́сиши словѣнскыѧ бѹкарѧ г҃лѧ · кто вы писмена створилъ е҆сть · и҆ли книгы прѣложил, то вьси вѣдѧть · и҆ ѿвѣщавше рекѫть · ст҃ыи кѡстанти́нъ философъ нарицаемыи ки́рълъ · тъ̏ намь пи́смена створи и҆ книгы прѣложи · и҆ меѳодие братъ е҆го · и҆ а҆ще въпро́сиши въ кое врѣмѧ, то вѣдѧть и҆ рекѫть · ꙗ҆ко въ врѣмена михаила цр҃ѣ гръчьскаго · и бориса кнѧꙃа блъгарскаго · и растица кнѧꙃа морⸯска · и҆ коцелѣ кнѧꙃа блатенⸯска · въ лѣта же ѿ съꙁданиа въсего мира, ꙅ҃ т҃ ѯ҃г · Сѫть же и҆ и́ни ѿвѣти · ѧ҅же и҅ инде речемъ · а҆ нинѣ нѣстъ врѣмѧ · такъ раꙁѹмъ братие б҃ъ е҆сть далъ словѣнѡмъ · е҆мѹже слава и҆ чьсть и҆ дръжава и҆ покланѣние · нинѣ и҆ присно · и҆ въ бесконечныѧ вѣкы, а҆мин :—